عطشان يا صبايا
وانا عاشق .. ع السبيل
عطشان
والميه ف بلدي
على عكس ما يجري النيل
والنخل العالي مطاطي
والجذع الواطي ذليل
والريح العاكس كابس
والريح العاطي بخيل
والنسمه اتعكر لونها
من هم الناس يا خليل
عطشان والنيل في بلدي
والزرع اخضر وجميل
وانا كنت امبارح خالي
واليوم دا صبحت عليل
عطشان ودوايا حبيبي
يسقيني العشق دليل
ودليل الحب .. عمايل
وكلام الحب جميل
وانا كل ما أقول التوبه
تغويني .. المواويل
تطرح في القلب جناين
تفقس فيها الزغاليل
عشاق يا حمام الغيه
ولا فيش قدامنا بديل
سكه ومحسوبه علينا
نمشيها
جيل ورا جيل
ع الشوك
نفرد خطاوينا
في الليل
تضوي القناديل
حوالينا قلوب حبابه
ومعانا العقل دليل
والشمس تصب صبابه
والمنبع نهر النيل
وان لاموا علينا يلوموا
ما لهمش علينا سبيل
ما هو شوك العشق
ملامه
والشوك
في الورد أصيل
ودوني ع السبيل
ودوني ع السبيل
..
..
احمد فؤاد نجم
هناك ٨ تعليقات:
ااااااه دايما بيجي على الجرح ابونا ابو النجوم ده
كل سنة وإنت طيب يا عبد الله
كل عيد وإنت طيب
كفاية الرد ده بقى لحسن نعيد فى مارينا
امممممممم احمد فؤاد نجم يبقى لا تعليق اكيد يعنى........
كل سنة وانت طيب يا عبد الله
عبد الله انا قريت البوست اللى فات ... جامد جامد جامد يا ابنى بس تصدق انى كنت بحب اقول النشيد قوى فى المدرسة والله كنت بحس انى مبسوطة كدة حاجة معنوية لطيفة ........
اه الاهلى فى كل حتة عمل يجيب اجوان والزمالك استقال خلاص..
آبي هانم
فعلا والله بيجي عالجرح ولو سمعتيها بصوت الشيخ امام حاجه روعه فعلا
الحان جامده جدا والصوت اجمد واجمد
الله يرحمه الشيخ امام ويخلينا عم احمد فؤاد نجم
maiosha
وانتي طيبه وبالف خير وعيد مبارك قصدي عيد سعيد
ضاكتوره اوجي
وانتي بألف خير
انا بقى مكنتش بحب اقوله خالص
لا لالالالالالالالالالالالالالالا انتي كمان اهلاويه
كلكوا عليا ولا ايه
إرسال تعليق