طب وحياة صيامي يا اخي ..

صباح الرز بلبن اللي بمكسرات عالوش اللي عالسحور , او مساء الكنافه والقطايف واللي بعد الفطار .. حسب إضاءة الأوضه اللي انت قاعد فيها .

رمضان كريم عليكوا كلكم النهارده خلاص بقينا 18رمضان ويومين تنتهي ايام المغفره ونبتدي ايام العتق من النار

أكيد رمضان زي أي شهر فيه سلبيات وما بنتحولش فيه لملايكه كلنا ..

اولا الدخله الغريبه بتاعت الموضوع دا عن الاكل وآه من الاكل والتركيز على الأكل الواحد وهو بيتسحر يا ترى الفطار بكره ايه نظامه وشهر هجر الاكل .. بقدرة قادر بيتحول الأكل هو محور اهتمام الناس فيه وطبعا بعد الأكل لازم نريح وننام ولا تراويح ولا عشاحتى وعلى رأي القائل - العشاء ممتده - بيصحى يصليها قبل السحور علطول ..

في هذا الشهر الكريم يكثر القسم بالصيام - وحياة صيامي يا اخي زي ما بقول لك كده - ويا سلام بقى لو دخلت بالصدفه حته كلها ستات يا عيني عليك وعلى دماغك اللي هتتاكل - وحياة صيامي يا اوختشي دا حصل - لا وايه التحابيش بتظهر بقى والفلفل والشطه اللي بتتحط عالكلام لازم تظهر .. مع العلم اننا في رمضان بس هي دي تسالي الصيام ..

غير كده بقى الواحد يعمل كل اللي هو عايزه ويجي في الاخر ويقول اللهم اني صائم .... ايه دا هي البنت دي لابسه كده -اللهم اني صائم - يعني هي لو كانت ظبطت الألوان كانت هتبقى اشيك - اللهم اني صائم - لا بس أكيد شعرها ناعم - اللهم اني صائم - الله يحرق البنات ولبس البنات اللي هيودينا في داهيه ..

لو حد فكر يروح صلاة القيام بيلاقي بقى واحد جاي يصلي وجايب معاه ابنه وابنه جايب معاه أكل شيبس او اي حاجه كأنها رحله .. ما علينا ..يدخلوا المسجد وننوس عين ابوه لازم يقعد جنب بابا وهو بيصلي بيضيع شرطين من شروط الصلاة في الجماعه وهي اعتدال الصف وسد الفُرج ولو كلمته يقول لك دا طفل وانا جايبه عشان يتعود عالصلاه ..

وطبعا حبيبنا كلنا التلفزيون والدش لازم نتابعه وشفت المسلسل الفلاني ايه رأيك فيه ويسرا في المسلسل دا ابدعت بصراحه لا وشفت سعد الصغير لما قتل نور الشريف في المسلسل دا اسمه ايه لا ولا اغنية يحيى الفخراني رهيييبه - برده دا نفس نظام الاكل -.

سلام بقى عشان اقوم الحق المسلسل واكل القطايف

رمضان كريم

بيس