نزلني هنا يا اسطى والفاتوره وحياتك

بما ان اي مواطن بيقدم خدمه لمواطن مقابل اجر لازم يديله فاتوره انا جربت اعملها وبما اني مواطن وسواق الميكروباص هو كمان مواطن و(مواطن على مواطن ما يضحكش) وانا بدي للتباع الاجره اللي هي ربع جنيه قولتله وحياتك فاتوره قاللي ايه قولتله تذكره وكان في واحد عجوز جنبي ابتسم ابتسامه كبيره وانا كمان كنت هضحك بس قلت اما اخليها للاخر المهم التباع قال للسواق شوف الراجل ده عايز ايه انا سقت فيها بالقوي بقى وقولتله عايز فاتوره انت مش قدمتلي خدمة هاتلي فاتوره السواق حاله حال كل المصريين اتعصب بسرعه وكان نازل ينزلني من الميكروباص الراجل اللي كان جنبي العجوز ده قالله ده هو بيهزر وانا كمان قولتله والله بهزر المهم السواق نزلني من الميكروباص ووصلت مشواري متأخر على ما اخدت ميكروباص تاني وانا متأكد ان السواق ده مش هيركبني العربيه دي تاني

نصيحه لكل مواطن مصري شريف عفيف كريم عبدالرحيم ما تسكتش على حقك في الفاتوره يا مواطن حتى مع سواق الميكروباص والتاكسي